Tolmod

Eg veit ikkje kvar å byrje dette innlegget.

No har det vore stopp ei stund, då det er usikkert kva me gjer framover. Det har då vore vanskeleg å planleggje for mykje, og det har blitt lagt litt på sida.

Me har hatt ein byggmester innom, han har kome med si vurdering, og me venter på ein anna mann som skal vurdere kva restaureringskostnadane vil bli sånn ca. Ein prosess som krevjer tolmod... noko underteikna ikkje har særskilt mykje av nett no. Likevel, det er ikkje anna å gjere enn å vente. Me vil ikkje planleggje for mykje før me veit kva utgangspunktet er.

Det kjem heller ikkje som ei overrasking at det er mykje som må gjerast. Når ein kjøper eit 90 år gammalt hus, reknar ein ikkje med å ha kjøpt eit hus i tipp-topp stand. Me veit at huset vert bra til slutt, det er den eine tingen me er heilt sikre på. Med den tankegangen kjem me bra gjennom denne ventetida :)

Me ser kva som skjer!

I mellomtida legg me ut litt ymse bileter frå huset. 

stova

 bestastova - med arvemøblar

kottet oppe med ulike variantar av tapet

kottet i sin heilskap

tapet bak tapeten - inne på "lugaren"

"lugaren" - tenk at her har farfar sove som liten!

gangen oppe

utsikt mot nordvest - ope og herleg!

utsikt frå veranda oppe

meir tapet - dette i eit innebygd skap

meir tapet - side om side

til slutt eit bilete av solnedgangen som går ned.

Fint.

Soverom

Soveromma oppe er nokolunde klare.

Me skal gjere litt, men det trengs ikkje altfor mykje. 

I rommet nedanfor tenker me gjesterom/hobbyrom. Langs vindauga ein lang pult med plass til diverse hobbyting og anna aktuelt. Tapeten på veggen er original frå 50-talet eller deromkring. Den er i fin stand, og eit sjarmerande minne frå dei tider, så me tenker å behalde den. Etter tips idag, tenker me på å måle veggane lysegrå, kanskje også golvet.

Frå gjesterommet er det opning inn til "lugaren", der er det to barnesenger festa til veggen. Ein koseleg krok! Me kjente på tapeteten, då den bula ut og ikkje var så godt i stand. Me vart nyfikne og kikka under i spenning. Det var to lag med tapet, ein mørkare under, og ein lys oppå. Det var ei merkbar endring i fargeval. Under tapetane fann me også fin panel!

Lukke! 

Me tenker å måle veggane lys grå, slik som i gjesterommet. Det kan bli ein fin krok for skjønne små overnattingsgjestar.

Soverommet her er det me tenker å ha som hovudsoverom. Ein deilig blåfarge på veggen, med vindauga vendt vestover. Bakkar, store tre og sjø i bakgrunnen. Eit godt rom! 

På begge romma, eigentleg alt oppe som er golvbelegg, tenker me å rive opp og leite fram tregolvet. 

Det fins eit kott oppe, rundt same størrelse som "lugaren", og der er det ennå meir tapet. Det har tidlegare vore brukt til kleskott, noko me moglegens også vil bruke det til. Eventuelt som eit lite gjesterom. 

Me er igang!

Spennande!

Overtaking!

ENDELEG!

 

Me har overteke huset, og skrive under overtakingsprotokoll idag... Huset såg annleis ut no utan møblar og andre ting. Ope og lyst, og lettare å sjå mogleikar. Det vart med å kikke idag, imorgon vert det vasking så langt me rekk før me skal på jobb.

Her er fleire ulike flater, og ein mørk vegg som stjel lys

- me får sjå kva me finn ut

Måling må til her... og nye kjøkenhandtak!

Me er igang!!

Det nærmar seg...

.. no nærmar det seg voldsomt til overtaking av hus. Medan me ventar køyrer me i sniglefart forbihuset, tek spaserturane sånn passe tilfeldig forbi huset, går innom i hagen når noverande huseigarane køyrer flyttelass... me er klare!!!

Kun dagar att, heldigvis. 

Fuglane på biletet skal vekk, og innanfor veggen der høyrer badet til. L tenker at me bør setje inn eit vindauga på badet når me fyrst er igang, så det er mogleg me gjer. Det vert då ikkje så stort som dei andre vanlege vindauga, men eit mindre, liknande dei to små vindauga på kjøkenet (som førebels ikkje fins bileter av). Det vil harmonere betre. 

Me gjekk i hagen i strålande solskin, og me vart inspirerte kan ein trygt sei.

Me såg også at me har to ulike typar epler i hagen. Eitt lite tre med raude epler (gode var dei!), og eitt stort tre pepra med epler. Det har me blitt forklart at er vinterepler, som kan lagras. Me er ikkje eplegnagarar, men epler er godt i så mykje meir enn berre å eta dei som dei er! I salatar, gryter, eplekake, smuldrepai, ovnsbakte... Herleg!

No skal me skrive epost til ei som kanskje kan hjelpe oss med planleggjing av påbygg, og ellers korleis me kan utnytte huset sitt potensiale best mogleg. Spennande tider!

Gangane

Det fins to gangar i huset. Ein liten inn til grovkjøkenet, og ein større inn frå "reiarinngangen". Det var fin-inngangen, der fintbesøk gjekk inn. 

Den minste gangen tenker me at vil bli brukt av oss, som ein kvardagsinngang. Ein fin plass for støvlar, regnklede og slik. Den er per dags dato mørk tre, så den skal få seg eit strøk med lys måling. 

Fine Huntington-støvler. Kanskje dei får bu i gangen? 

Den største gangen vil bli hovudgangen, tenker me. Me trur gangen er kome til i etterkant av sjølve husbygginga, og den består mykje av glas. Det ser ikkje ut til at glasa har blitt byta nokon gong, så me ser for oss at dei må skiftast. Me vil behalde dei, då det gir huset eit lyst og luftig preg. Ved å skifte vindauga vil det vere med på å isolere huset også. Meir enn det har gjort tidlegare, iallefall... 

Her ser ein litt av vindauga.
Bortover veggen mot døra tenker me å utnytte plassen godt, t.d. skoskap og spegel.

Rett innanfor døra, til venstre side når ein kjem inn, finn ein badet som skal renoverast. 

I gangen har me sett for oss lyse fargar, som i ellers av huset... Ein fin sval blåfarge kanskje. Ein kommode. Ei korg med tjukkesokkar i.

Kan denne vere grei? Norden benk frå IKEA

Eller eit friskt pust som dette frå Åhlens? Matchar badegulvet då, he he...

Kanskje ei slik slitesterk matte, også Åhlens?

 Me får sjå kva det vert til. Me

har mange val framføre oss, og me tenker at det er lurt å ha tenkt LITT på førehand. Kanskje, kanskje vert prosessen pittepittelitt enklare då. Det er lov å håpe!

Bad...

Badet er lite.

I byrjinga på huset si levetid var det utedo, så badet inne har kome til i etterkant. Me tenker som så at dei då fann ein ledig plass der dei kunne stue inn eit bad. Slik kan det iallefall sjå ut. Me tenker å pusse opp badet og behalde det som eit ekstra toalett. Tanken vår, ja, er å byggje større bad på sikt. Med badekar... me må ha badekar. Må og må, men det er ein luksus me ynskjer å ha i huset me ser for oss å bu i.

Huset er på 103 kvm. Det er ikkje alle som hadde budd slik med fem born og to vaksne no i desse dagar (vesentleg forskjell frå by til land også!), me har blitt ganske så bortskjemde. Eg likar tanken på å bu litt slik som dei gjorde tidlegare. Med det meiner eg ikkje at me skal gå tilbake til alt gammalt, men me har ikkje vondt av å kjenne på korleis det er å ikkje ha "alt" nytt og fint og flott. Ikkje minst så er det ikkje dumt å ta ting litt etter litt, ikkje nødvendigvis haste avgårde og ty til fyrste og beste løysing til huset. Me ynskjer å tenke oss om, og gjere kva me sjølv ynskjer å gjere, uavhengig av trender og det som måtte vera mest "in" nett no. Er det noko som verkar avskrekkande i høve til kjøp, så er det det. "Alle" har det! Javel, då skal eg iallefall ikkje ha det. Misforstå meg rett, eg ynskjer berre å lage ein heim som er personleg, ein heim som seier noko om oss.

Kva er det me er opptekne av? Kva er det som speglar oss og våre personlegdomar? Gjenbruk? Ja. Tradisjon? Ja. Nytt og gammalt om ein anna. Ting med sjel. Sprite opp innimellom med frisk pust frå 2012. Det er eit hus frå 1922, og me ynskjer å ta vare på det. Samstundes har me overteke dette huset i 2012, så det vil det bære preg av.

Så, tilbake til det dette innlegget eigentleg handla om, bad! (eg blir berre så engasjert, og må verkeleg ta meg sjølv i ikkje å skrive meir om ovannemnde emne!)

På badet er me usikker på nøyaktige mål, men det er akkurat plass til do, vask og dusjoppheng (heiter det det??). Me kan ha dusj utan dusjkabinett, men med dusjforheng. Det er ikkje vindauga på badet, og me lurar på korleis det ser ut bak veggane. Har me ein lett rivingsjobb framfor oss, eller finn me fuktskader bak veggen? Om ein månad frå no, veit me! Før den tid tenker me på kva me vil ha på badet. Me tenker lite og praktisk.

Lyst. Friskt. Lett å reingjere.

Me er ikkje sånn superbegeistra for fliser på bad, og me tenker difor at på dette "vetla" badet kan me gjerne ha vinyl. Ja, du leste rett, vinyl. Det er mykje stilig i vinyl no, og det er eit materiale som er greitt å bruke, og lett å reinhalde. Dette badet ynskjer me å få i stand kjapt og greitt! 

Her er eit gøy fargeval! Sjekk linken for fleire fargar
http://www.tarkett-floors.com/floors/site/no-no/topic/wetroom/article/24424/article.asp

 

Her er noko av det me har tenkt. Lyst og lett. Enkelt. IKEA alt saman .

(utanom vinylen då...)

Eg vert så glad av å sjå på den turkise fargen!! Tenk å sjå den kvar morgon, det er fint å vakne til! Me har ein del turkis, så sånn sett vil fargen gå igjen i heile huset. Herleg energigivande! 

Kva seier du, mannen?:)

Hausthagen

Med besøk og nydeleg solskin akkurat denne dagen, måtte me berre opp og kikke i hagen. Her er nokre bileter av hagen igjen, slik den ser ut i starten av september månad. Me gledar oss! Generelt sett til alt. Men, me gledar oss!

(Fin familie har sneke seg med på bileta, det er berre kjekt:)) 

Huset sett frå hagen.
Me ser for oss å bygge ut på høgre side i biletet.
På midten av huset vil me bygge ein ark, med glasvindauger og dører ut i hagen.
Oppe, ein balkong eller lite rom. 

Frå hagen - her skal det ryddast

Venstre side av huset, mot vegen

Her går det ein smal sti, den skal få kome fram igjen

Her skal det ryddast, slik at me kan plukke bringebær langs stien:)

Fin plen, fin og kjekk jente og stort epletre i bakgrunnen

Huset er spesielt fint frå denne vinkelen (syns iallefall underteikna!)
I 2.etg soveromsvindauge 1.etg kjøkenvindauga

Klesstativstengene skal vekk, då dei er ganske så rustne. Nytt må opp! Herleg med friske klede.
Rydding her også...

Ho ho! Spennande, spennande....

Tankar kring huskjøp...

Eg (les: damo) vert så inspirert! Det er så mykje ein kan gjere. Det er mykje som må gjerast før ein kan tenke innredning, interiør, men eg er i det moduset, nu! Kva farge skal det vera i gangen, kva teppe kan vere i gangen, kva sort kommode... eg klør i fingrane etter å overta huset, gå inn og utforske huset, måle opp, finne ut kva som skal vera kvar, få ein oversikt.

No har eg så mange tankar om kva som skal vere kvar, men eg har jo verkeleg ikkje peiling på om kista passer akkurat der eg tenker den skal vere, og om rommet ser ut akkurat slik som eg hugser det. Difor har eg nok innreia mykje feil i hovudet mitt, og det vert nok mange nye innreiingar framover også.  

Rundt, nydeleg teppe frå Åhlens - dette ynskjer eg meg!

Idag er det 28 dagar igjen til overtaking. Eg skriv på ei liste... kva må me gjera, og kvar. Me må byrje i ein ende... men kva ende!?

Fyrst og fremst:

- vaske ut (eller vente litt med det??)

- kaste/få oversikt over kva me vil behalde av gamle ting (ja, for dei let mykje av det som fulgte med huset vere igjen, slik at me kan få valet om det skal kastes eller ei. Ting som stod igjen etter tante L og oldeforeldra mine... Det er kjekt! Mykje arbeid kan det bli, men kjekt:))

Hm... det er så mykje tankar om kva som må gjerast, men det er vanskeleg å sei før me kjem inn i huset. Me veit at me skal ta badet fyrst av ting som må gjerast reint byggteknisk. Mannen skal rive ned det han kan på badet, for slik å spare nokre kroner, håpar me. Det er eit lite bad, og me tenker at det går kjappare å bli ferdig med enn eit stort. Eg lev i trua på at me tenker rett! Om me får det ferdig, NÅR me får det ferdig, skal me bu i huset og så ta for oss rom for rom. Nokre rom treng me berre å måle i fyrste omgang. Det gjeld for det meste 2. etasje. I fyrste omgang... så får me sjå kor lenge fyrste omgang gjeld. Kanskje berre nokre månadar, før me ser meir som må gjerast. Det treng me iallefall ikkje lure på, me kjem til å ha nok prosjekt å forbarme oss over! Me får høyre at, "ja, no har dåke kjøpt dåke arbeid." Mitt svar til det: "Ja, det har me, og me gledar oss til det!" Me har kjøpt oss hus, og me har kjøpt eit hus der me ser for oss ei framtid. Det me gjer no, er å lage ein heim, og det er noko me ser fram til å gjere.

Me kjøpte dette huset, for her vil me bu, og her vil me lage ein heim. Så enkelt er det. Det er klart oppussing vil by på utfordringar, men det er nettopp det det er, utfordringar. Og utfordringar, dei er til for å løysast. Me er klare for alt! Eg tenker som så, at me er lukkeleg uvitande om arbeidet som fylgjer med eit gammalt hus. Det får me tidsnok erfare, men fokuset no er at me har kjøpt eit hus, og me gledar oss til å overta og lage heimen vår.

Kva er så ein heim? For underteikna er ein heim ein stad der ein finn ro. Eg ser fram til dagen der eg kjenner at huset er heimen min. Å kome heim etter jobb og vera lukkeleg for at eg er heime. Min heim. Vår heim. Å kjenne på den kjensla at her skal me bu. Me veit ikkje kvar me havnar og kvar me ender opp i livet, og godt er det, men nett no, her og no, er det Lillatun som skal vera heimen vår. Eg gledar meg til å ta fatt på dette prosjektet!

Slike frukostar skal me ha mange av... det ser iallefall veldig innbydande ut! Nam...

Dette blei vêl tankefullt, men eg har mange tankar kring det å kjøpe hus, og det å flytte tilbake til der eg kjem frå. Kjenslene kring det går opp og ned. Nokre dagar kjenner eg på at "hjelp, kva har me gjort", medan andre dagar kjenner eg på at det er heilt rett.

Eg skriv mykje og tenker mykje, og eg kjenner mest på tanken om at dette er eit rett val. Her og no er dette det rette valet. Det er ei god kjensle. Eg trur eg avsluttar med det:)

Hagen

Inngangspartiet

Nede ved skuret nede i hagen, - rabarbra!

Ein liten krypkjellar.
Plenkipparen sin framtidige bustad, kanskje?
sjekk ut http://www.ordne.no/2008/06/krypkjeller-ta-et-tak/

Ein fin, rosa blome! Mange rosebuskar.
Del av buskaset nedanfor huset, nedanfor stovevindauga. 

Hagen var opprinneleg flott og strigla, og me har blitt fortalt at oldeforeldra jobba mykje i hagen. Det var lite tid for kaffikos og ei stille stund, og det er kanskje difor hagen alltid var like flott. Folk som har fått med seg at me har kjøpt hus, har alle kommentert kor flott hage som var der. Dei lurar på om den er like fin ennå... Oldemor var nøye på korleis ho ville ha det, og ho hadde ein av dei finaste hagane på øya har me blitt fortalt. Hagen var full av bærbuskar, og den var inndelt i gangar laga av stein og grus.

Her har me jobb framfor oss. Inni her er det mange, fine rosesortar!
Dei vert fine til våren..

Her ser me tydeleg at det er lagt steinar for å skape stiar...
dei vil me få fram att!

Me blei fortalt at det var eit lysthus i hagen, noko eg lurar på om kan vere eit lysthus av roser. Det er det nokre andre som har fortalt, korleis dei hadde sett opp stenger og netting som rosene klatra på og laga eit 'hus' av det. Om vinteren stod det litt tomt i hagen, men om sommaren var det flott med klatrande roser. Stengene står støypt i hagen ennå, og det vert spennande å sjå om me prøver oss på det same. Ved stengene står det også eit steinbord, og der skal me ha mykje hagekos! 

Steinbord = KJEKT!
Her skal me ete mykje godt.
Me treng berre rydde pittelitt buskar vekk fyrst...

Pappa er hageinteressert, og han har spurt fint om han kan få boltre seg i hagen.... ha ha, ja, værsågod! Me treng den hjelpa me kan få, då det er ganske så overgrodd. Dei me har kjøpt huset fortalte at dei har hatt nok å gjere inne, og det er det jo med eit gammalt hus. Me håpar å få hagen i stand igjen, og med oss har me gode hjelparar. No blir det huset innvendig som skal jobbast med, men me ser fram til å lage ein plan for hagen iløpet av vinteren. 

Hagen sett frå oppsida/venstre sida av huset.
Klesstativet skal nok vekk, men erstattas av eit nytt eit. 

Me ynskjer å ha mange urter i hagen, poteter, gulrot, lauk, reddik... hagearbeid er hageterapi. Ikkje minst er det ein fin tanke å dyrke sjølv. Mykje spennande! 

Eit kjekt uthus i enden av hagen

Nederst i hagen ein plass.
Det er mange artar i hagen, og mykje av dei!

Ved uthuset, mykje buskas!

Ved inngangspartiet - ein flott bregne

Litt av eldste uthuset, på framsida ved inngangspartiet

Fine furuar 

Litt å gjere her, ja. Her i solveggen kan kanskje urtene trivast!

Stor, flott kristorn - den vil me behalde!

På veg ned mot hagen, høgre side av huset.
Her trengs det å ryddast, slik at stien kjem fram att. 

Her ser du ein liten del av porten.
Den ynskjer me å få i stand, slik at den kan lukkast.
Fin hengebusk (kva heiter den??) som diverre er giftig..
me får sjå kva me gjer med det

FinFin blome

 Hagen får stå som den er foreløpig, men me vil ta ei opprensking iløpet av hausten, er planen iallefall.

Bål i hagen, frisk haustlukt, nista ute ved steinbordet. Ja, det blir bra:)